AIM_Logo_irish

Is Ă© atĂĄ sa MhĂșnla um Rochtain agus Cuimsitheacht (AIM) TĂșs nĂ­os Fearr nĂĄ mĂșnla tacaĂ­ochtaĂ­ atĂĄ deartha lena chinntiĂș go mbeadh leanaĂ­ faoi mhĂ­chumas in ann an ClĂĄr um ChĂșram agus Oideachas na Luath-Óige a rochtain. TĂĄ sĂ© mar aidhm aige a chur ar chumas solĂĄthraithe seirbhĂ­se taithĂ­ chuimsitheach rĂ©amhscoile a chur ar fĂĄil, agus a chinntiĂș go mbeadh gach leanbh cĂĄilithe in ann pĂĄirt iomlĂĄn a ghlacadh sa chlĂĄr ECCE agus leas iomlĂĄn a bhaint as oideachais agus cĂșram luathbhlianta ar ardchaighdeĂĄn.

MĂșnla leanbhlĂĄrnach tacaĂ­ochtaĂ­ is ea AIM, a bhfuil seacht leibhĂ©al tacaĂ­ochta forchĂ©imnithĂ­ ag baint leis, Ăł thacaĂ­ocht uilĂ­och go dtĂ­ tacaĂ­ocht dhĂ­rithe, atĂĄ bunaithe ar chuid riachtanas an linbh agus an tsolĂĄthraĂ­ sheirbhĂ­se. I gcĂĄs mĂłrĂĄn leanaĂ­ is leor na tacaĂ­ochtaĂ­ uilĂ­ocha a chuirtear ar fĂĄil faoin mĂșnla. I gcĂĄs leanaĂ­ eile, d'fhĂ©adfadh aon tacaĂ­ocht ar leith a bheith riachtanach chun go mbeadh sĂ© in ann pĂĄirt a ghlacadh sa rĂ©amhscoil, amhail rochtain ar bhall sainfhearais. I gcĂĄs roinnte bige leanaĂ­, d'fhĂ©adfadh foireann seirbhĂ­sĂ­ agus tacaĂ­ochtaĂ­ a bheith riachtanach. Is Ă© sin le rĂĄ, tĂĄ an mĂșnla deartha le go mbeadh sĂ© freagrĂșil do chuid riachtanas gach linbh aonair i gcomhthĂ©acs an tsuĂ­mh rĂ©amhscoile. Cuirfidh sĂ© tacaĂ­ochtaĂ­ saincheaptha, praiticiĂșla ar fĂĄil bunaithe ar riachtanas agus nĂ­ bheidh diagnĂłis foirmeĂĄlta mĂ­chumais ag teastĂĄil.

Cad iad na tacaĂ­ochtaĂ­ a chuirtear ar fĂĄil faoi AIM?

Cuireann AIM foireann tacaíochtaí uilíocha agus dírithe ar fåil idir 7 leibhéil.

Diagram-of-Model_IRISH

TacaĂ­ochtaĂ­ UilĂ­ocha (LeibhĂ©il 1 - 3 den MhĂșnla um Rochtain agus Cuimsitheacht) TĂĄ tacaĂ­ochtaĂ­ uilĂ­ocha deartha chun cultĂșr cuimsitheach a chur chun cinn agus chun tacĂș leis laistigh de shuĂ­omhanna rĂ©amhscoile trĂ­ roinnt tionscnamh oideachais agus roinnt tionscnamh tĂłgtha acmhainne a ĂșsĂĄid. Go sonrach:

  • TĂĄ Cairt nua um Chuimsitheacht i ndiaidh a bheith forbartha d'earnĂĄil na luathbhlianta. Iarrtar ar sholĂĄthraithe seirbhĂ­se a n-ainm a chur leis an gCairt trĂ­na mBeartas Cuimsitheachta fĂ©in a chuir a dtoil a chĂ©ile agus a fhoilsiĂș. Chun tacĂș leis an bprĂłiseas sin, tĂĄ TreoirlĂ­nte nuashonraithe IlchineĂĄlachta, Comhionannais agus Cuimsitheachta do ChĂșram agus Oideachas na Luath-Óige i ndiaidh a bheith curtha ar fĂĄil agus cuirfidh na CoistĂ­ Contae agus Cathrach i gCĂșram LeanaĂ­ clĂĄr nĂĄisiĂșnta oiliĂșna ar fĂĄil maidir leis an gCairt um Chuimsitheacht agus maidir leis na TreoirlĂ­nte. Is fĂ©idir an Chairt um Chomhionannas agus Cuimsitheacht a rochtain agus na TreoirlĂ­nte um Chomhionannas agus Cuimsitheacht a rochtain anseo.
  • Cuirfear tĂșs le clĂĄr nua ardoideachais, “Ceannaireacht um Chuimsitheacht sna Luathbhlianta” (LINC), i mĂ­ MheĂĄn FĂłmhair 2016. Cisteoidh an Roinn LeanaĂ­ agus GnĂłthaĂ­ Óige suas le 900 ĂĄit in aghaidh na bliana ar an gclĂĄr seo. Beidh cĂ©imithe de chuid an chlĂĄir in ann tabhairt faoi rĂłl nua ceannaireachta mar Chomhordaitheoir Cuimsitheachta laistigh dĂĄ suĂ­omh rĂ©amhscoile agus mar gheall air sin cuirfear €2 le haghaidh gach linbh le rĂĄta chaipitĂ­ocht ECCE a Ă­ocfar don suĂ­omh sin.
  • I ndeireadh na dĂĄla, cisteoidh an Roinn LeanaĂ­ agus GnĂłthaĂ­ Óige clĂĄr leathan ilbhliantĂșil oiliĂșna foirmeĂĄlta agus oiliĂșna neamhfhoirmeĂĄlta do bhaill foirne rĂ©amhscoile maidir leis an mĂ­chumas agus leis an gcuimsitheacht agus cuirfidh na CoistĂ­ Contae agus Cathrach i gCĂșram LeanaĂ­ ar fĂĄil Ă©, i gcomhoibriĂș leis an FSS agus le gnĂ­omhaireachtaĂ­ eile.

TacaĂ­ochtaĂ­ DĂ­rithe (LeibhĂ©il 4 - 7 - den MhĂșnla um Rochtain agus Cuimsitheacht) Tugann fianaise idirnĂĄisiĂșnta le tuiscint gur leor na tacaĂ­ochtaĂ­ ar leibhĂ©il 1 go 3, ach iad ĂĄ bhforbairt mar is cuĂ­, chun tacĂș le mĂłrĂĄn leanaĂ­ atĂĄ faoi mhĂ­chumas. BĂ­odh sin mar ata, i gcĂĄs go measfadh solĂĄthraĂ­ seirbhĂ­se, i gcomhar le tuismitheoir nĂł caomhnĂłir, gurbh fhĂ©idir gur gĂĄ le tacaĂ­ocht ĂĄirithe eile chun riachtanais linbh ar leith a chomhlĂ­onadh, d'fhĂ©adfaidĂ­s iarratas a dhĂ©anamh ar thacaĂ­ocht dhĂ­rithe amhĂĄin nĂł ar nĂ­os mĂł nĂĄ tacaĂ­ocht dhĂ­rithe amhĂĄin dĂłibh seo a leanas:

  • TĂĄ sainchomhairle, meantĂłireacht agus tacaĂ­ocht ĂĄ gcur ar fĂĄil ag foireann 50 saineolaĂ­ i gcĂșram luathbhlianta agus oideachas le haghaidh leanaĂ­ faoi mhĂ­chumas. TĂĄ na saineolaithe sin, ar a dtugtar SpeisialtĂłirĂ­ Luathbhlianta (Rochtain agus Cuimsitheacht), lonnaithe i SeirbhĂ­s NĂĄisiĂșnta um Fhorbairt CĂĄilĂ­ochta na Luath-Óige ThĂșs nĂ­os Fearr.
  • TĂĄ scĂ©im ar fĂĄil chun sainfhearas, sainghlĂ©asanna nĂł deontais chaipitil do mhionathruithe foirgnimh a chur at fĂĄil, a bhĂ­onn riachtanach chun tacĂș le rannphĂĄirtĂ­ocht linbh sa chlĂĄr ECCE.
  • TĂĄ seirbhĂ­sĂ­ teiripe, atĂĄ rĂ­thĂĄbhachtach do rannphĂĄirtĂ­ocht an linbh sa chlĂĄr ECCE, ar fĂĄil trĂ­d an mĂșnla agus is Ă© an FSS a chuirfidh ar fĂĄil iad.
  • Mar fhocal scoir, i gcĂĄs nĂĄr leor na tacaĂ­ochtaĂ­ thuasluaite chun cuid riachtanas an linbh a chomhlĂ­onadh, d'fhĂ©adfadh na solĂĄthraithe seirbhĂ­se, i gcomhphĂĄirtĂ­ocht le tuismitheoirĂ­ nĂł caomhnĂłirĂ­, iarratas a dhĂ©anamh le haghaidh caipitĂ­ochta breise chun tacaĂ­ocht bhreise sa seomra ranga a chistiĂș nĂł chun laghdĂș a dhĂ©anamh ar an gcĂłimheas idir baill foirne agus leanaĂ­.

 

Conas is féidir liom tacaíochtaí AIM a rochtain?

FĂ©adfaidh solĂĄthraithe seirbhĂ­se agus tuismitheoirĂ­ nĂł caomhnĂłirĂ­ iarratais a chur isteach le haghaidh tacaĂ­ochtaĂ­ AIM Ăł Mheitheamh 2016 lena chur ar a gcumas dĂłibh pleanĂĄil ar aghaidh le haghaidh clĂĄrĂș rĂ©amhscoile i mĂ­ MheĂĄn FĂłmhair 2016 agus ina dhiaidh sin. Ba cheart a thabhairt d'aire go mbeidh an prĂłiseas iarratais ar oscailt i rith na bliana, ach i gcĂĄs leanaĂ­ atĂĄ faoi mhĂ­chumais choimplĂ©ascacha, moltar do thuismitheoirĂ­ agus do sholĂĄthraithe iarratais a chur isteach go luath. 

TacaĂ­ochtaĂ­ UilĂ­ocha (LeibhĂ©il 1 - 3 den MhĂșnla um Rochtain agus Cuimsitheacht)
Féadann Cleachtóirí Luathbhlianta iarratas a dhéanamh ar an gclår nua ardoideachais, "Ceannaireacht um Chuimsitheacht sna Luathbhlianta" nó (LINC), ag www.lincprogramme.ie.

FĂłgrĂłfar clĂĄir nĂĄisiĂșnta oiliĂșna maidir leis na TreoirlĂ­nte IlchineĂĄlachta, Comhionannais agus Cuimsitheachta, chomh maith leis an TreoirlĂ­nte maidir le mĂ­chumas agus cuimsitheacht i gcoitinne, ar an suĂ­omh grĂ©asĂĄin seo agus ar shuĂ­omhanna grĂ©asĂĄin na gCoistĂ­ Contae agus Cathrach i gCĂșram LeanaĂ­ ar fad. FĂ©adfaidh solĂĄthraithe seirbhĂ­se agus cleachtĂłirĂ­ iarratas a dhĂ©anamh le haghaidh ĂĄiteanna ar na clĂĄir oiliĂșna seo trĂ­ Choiste CĂșram LeanaĂ­ a gCathrach ĂĄitiĂșla nĂł a Contae ĂĄitiĂșla.

TacaĂ­ochtaĂ­ DĂ­rithe (LeibhĂ©il 4 - 7 - den MhĂșnla um Rochtain agus Cuimsitheacht)

FĂ©adfar comhairle agus tacaĂ­ocht Ăłn tSainseirbhĂ­s Luathbhlianta (Rochtain agus Cuimsitheacht) a rochtain ar an bhfĂłn (01-511 7222), trĂ­ rĂ­omhphost (onlinesupport@pobal.ie) nĂł trĂ­d an bhfoirm iarratais ar lĂ­ne de chuid AIM ag www.pobal.ie. NĂ­ gĂĄ an fhoirm sin a chomhlĂĄnĂș ach aon uair amhĂĄin chun tacaĂ­ochtaĂ­ a rochtain ar leibhĂ©il 4, 5, 6 nĂł 7. Chun chrĂ­ocha an eolais, is fĂ©idir cĂłip den fhoirm a rochtain anseo.

Chun iarratas a dhĂ©anamh le haghaidh sainfhearais, glĂ©asanna nĂł deontais do mhionathruithe, ba cheart do sholĂĄthraithe seirbhĂ­se, i gcomhphĂĄirtĂ­ocht le tuismitheoirí nĂł caomhnĂłir, an chuid ĂĄbhartha den fhoirm ar lĂ­ne thuasluaite a chomhlĂĄnĂș ar PIP. Chun chrĂ­ocha an eolais, is fĂ©idir cĂłip den chuid seo den fhoirm a rochtain anseo.

Chun iarratas a dhĂ©anamh ar sheirbhĂ­sĂ­ teiripe nĂł ar chaipitĂ­ocht bhreise chun tacaĂ­ochta bhreise sa seomra ranga a chistiĂș, ba cheart do sholĂĄthraithe seirbhĂ­se, i gcomhphĂĄirtĂ­ocht le tuismitheoirĂ­ nĂł caomhnĂłirĂ­, an chuid ĂĄbhartha den fhoirm iarratais ar lĂ­ne a chomhlĂĄnĂș ar PIP, lena n-ĂĄirĂ­tear an mhĂ­r den fhoirm a bhaineann leis an bPrĂłifĂ­l um Rochtain agus Cuimsitheacht. Meastar nach mbeadh an chaipitĂ­ocht ar leibhĂ©al 7 ag teastĂĄil ach Ăł 1 go dtĂ­ 1.5% de leanaĂ­ in ECCE agus dĂĄ bhrĂ­ sin nach mbeadh ach an cĂ©atadĂĄn sin de leanaĂ­ ina theideal.

Mar fhocal scoir, cĂ© go mbeidh An MĂșnla um Rochtain agus Cuimsitheacht ĂĄ thabhairt isteach Ăł mhĂ­ an Mheithimh 2016, tĂłgfaidh sĂ© am lena chur i bhfeidhm go hiomlĂĄn agus acmhainn ĂĄ tĂłgĂĄil ar fud na hearnĂĄla.

Conas is féidir liom tuilleadh eolais a fhåil amach?

Le haghaidh eolais níos mionsonraithe ar AIM, féach år gcuid leathanach tiomanta le do thoil Do Thuismitheoirí,  Do Sholåthraithe Seirbhíse, år gcuid Ceisteanna Coitianta agus leathanach gréasåin år gcuid Eochairdhoiciméad.

Beidh Coiste CĂșram LeanaĂ­ de chuid do Chathrach ĂĄitiĂșla ĂĄbalta tuilleadh eolais agus treorach a chur ar fĂĄil.

CĂșlra AIM

I mĂ­ na Samhna 2015, sheol an Rialtas TuarascĂĄil an GhrĂșpa Thras-Rannaigh ar an gClĂĄr um ChĂșram agus Oideachas na Luath-Óige (COLÓ) do LeanaĂ­ faoi MhĂ­chumas. Sa tuarascĂĄil siĂșd, leagadh amach fĂ­s shoilĂ©ir le haghaidh mĂșnla cuimsitheach, leanbhlĂĄrnach tacaĂ­ochtaĂ­ a chinnteodh go mbeadh leanaĂ­ faoi mhĂ­chumas in ann an ClĂĄr um ChĂșram agus Oideachas na Luath-Óige (ECCE) a rochtain i ngnĂĄthshuĂ­omhanna rĂ©amhscoile. Thacaigh an Rialtas leis an mĂșnla nua agus cuireadh cistiĂș ar fĂĄil dĂł trĂ­ BhuisĂ©ad 2016 chun tacĂș lena thabhairt isteach Ăł mhĂ­ MheĂĄn FĂłmhair ar leith.

Is tionscnamh Tras-Rialtas Ă­ forbairt an MhĂșnla nua um Rochtain agus Cuimsitheacht, faoi cheannaireacht na Roinne LeanaĂ­ agus GnĂłthaĂ­ Óige, agus tĂĄ baint leis freisin ag na an Roinn SlĂĄinte, an Roinn Oideachais agus Scileanna agus eile. Thug an tAire LeanaĂ­ agus GnĂłthaĂ­ Óige, An Dr. Katherine Zappone, T.D., an mĂșnla isteach ar 15Ăș Meitheamh 2016 le cur ar chumas tuismitheoirĂ­ agus solĂĄthraithe seirbhĂ­se pleanĂĄil chun tosaigh le haghaidh clĂĄraithe i mĂ­ MheĂĄn FĂłmhair agus ina dhiaidh sin. FĂ©adann tĂș amhsrc ar an bPreasrĂĄiteas ar thabhairt isteach a mhĂșnla anseo.